Aðgengi að gögnum er lykillinn að framþróun þekkingar, nýsköpun og frekari hagnýtingu rannsókna.
Gögn í opnum aðgangi fela í sér mikinn ávinning fyrir gagnaeigendur, notendur gagna og fræðafólk. Með því að veita aðgengi að áður óaðgengilegum gögnum skapast nýir möguleikar á þverfaglegum vísindarannsóknum og úrvinnslu, og samtúlkun með alþjóðlegum vísindagögnum. Opin gögn gefa einnig möguleika á að skoða aðra fleti en þegar hafa verið skoðaðir og geta verið kveikja að nýjum og áhugaverðum rannsóknaspurningum. Einnig má nýta fyrirliggjandi gögn til undirbúnings fyrir ný rannsóknaverkefni, s.s. til að áætla mögulegar niðurstöður og áhrifastærðir þeirra og við gerð langtímaáætlana um öflun gagna.
Aðgangur að rannsóknagögnum er einnig mikilvægur fyrir rannsóknarstarf ungs fræðafólks og nemendur en nýta má flest gagnasöfnin í opnum aðgangi hjá GAGNÍS við undirbúning og gerð lokaverkefna og í kennslu
Með opnu og auðveldu aðgengi að rannsóknagögnum aukast möguleikarnir á að nýta betur en hingað til íslensk gögn í rannsóknum, kennslu, fjölmiðlun og opinberri stefnumótun og ákvarðanatöku.
Önnur rök snúa að því að opin rannsóknagögn auka gæði og gegnsæi vísinda þar sem þau auðvelda fræðafólki, og almenningi, að sannreyna niðurstöður rannsókna og leggja mat á gæði þeirra. Loks má nefna fjárhagsleg og siðferðisleg rök sem snúa helst að því að þar sem opinbert fé er notað til að safna rannsóknagögnum sé eðlilegt og sjálfsagt að þau séu gerð aðgengileg öðrum, ekki síst til að nýta fjármunina sem best.
